Исаиа

Вавилоны эсрэг тунхаглал

13  ¹ Амозын хүү Исаиагийн үзсэн,

 Вавилоны тухай зөн.

² Нүцгэн толгодын дээр туг босгож,

Дуугаа тэдэн уруу өндөрсгөн

Гараа дохиж тэднийг

 ноёдын үүд уруу оруул!

³ Би уур хилэнгээ

 гүйцэлдүүлэхийн тулд

Өөрийн ариусгасан нэгэнд

 тушаал өгсөн.

Өргөмжлөл дотор минь баясдаг

Хүчирхэг дайчдаа дуудсан.

⁴ Олон хүний хөл үймээн мэт

Уулсын дээрх

 нүсэр их чимээ шуугиан,

Хамтдаа цугларсан үндэстнүүд,

Хаанчлалуудын үймэлдэх

 асар их чимээ шуугиан!

Түг түмдийн ЭЗЭН

 тулаанд цэргүүдийг

Цуглуулж байна.

⁵ Тэд алс холын орноос,

Тэнгэрийн хязгаараас ирж байна.

ЭЗЭН ба Түүний

 зэвүүцлийн зэвсэг

Бүх газрыг устгахаар ирж байна.

⁶ ЭЗЭНий өдөр ойрхон учир

 уйлагтун!

Төгс Хүчит Нэгэнээс сүйрэл мэт

 ирж байна.

⁷ Түүнээс хүн бүрийн

 гар нь суларч,

 зүрх нь хайлна.

⁸ Тэд айж түгшин

 өвчин зовлон

 тэднийг барина.

Тэд төрөх гэж буй эмэгтэй шиг

 тарчилна.

Тэд балмагдан бие биенээ харж,

Царай нь галын дөл лугаа адил

 шатна.

⁹ Газрыг хоосруулж,

 түүний нүгэлтнүүдийг устгах

Аймшигт, уур хилэнгээр бадарсан

 ЭЗЭНий өдөр ирж байгааг

 харагтун.

¹⁰ Тэнгэрийн одод болон

 түүний ордууд гэрлээ эс өгөх

 бөгөөд

Нар мандахдаа харанхуйлж,

 сар гэрлээ үл тусгана.

¹¹ Бузар булай явдлынх нь төлөө

 ертөнцийг,

Хилэнцийнх нь төлөө

 буруутныг Би шийтгэнэ.

Би ихэмсэг хүмүүсийн

 дээрэнгүй занг эцэс болгоно.

Хэрцгий догшин хүмүүсийн

 бардам занг басамжилна.

¹² Би хүнийг цэвэр алтнаас ч

 илүү үнэтэй болгон

Хүн төрөлхтнийг

 Офирын алтнаас

 ховор болгоно.

¹³ Би тэнгэрийг донсолгоно.

Түг түмдийн ЭЗЭНий шатаж буй

 уур хилэнгийн өдөр

Түүнийг уурлахад газар

 байрнаасаа чичирнэ.

¹⁴ Хүн бүр хөөгдсөн гөрөөс,

Эзэнгүй хонь лугаа адил

Өөрийн хүмүүс тийш эргэж,

Төрөлх нутаг уруугаа зугтана.

¹⁵ Олдсон хүн бүрийг жадалж,

Олзлогдсон хүн бүрийг

 илдээр хорооно.

¹⁶ Нялхсыг ч нүдний нь өмнө

 хэмх чулуудан

Орон байрыг нь тонож,

Эхнэрүүдийг нь хүчирхийлнэ.

¹⁷ Үзэгтүн, Би мөнгийг үл тоогч,

Алтыг үл таашаагч медечүүдийг

Тэдний эсрэг хөдөлгөнө.

¹⁸ Нум нь залуусыг хиаруулан

Хэвлийд байгаа үрсийг ч үл

 өршөөнө.

Тэдний нүд хүүхдийг ч эс энэрнэ.

¹⁹ Хаанчлалуудын чимэг,

Халдеичуудын бахархлын алдар

 Вавилон нь

Содом, Гоморраг Бурхан

 унагасан шиг унана.

²⁰ Хэзээ ч тэнд хүн эс оршин сууж,

Үеэс үед үл амьдарна.

Арабууд тэнд майхнаа эс барина,

Хоньчид сүргээ үл хотлуулна.

²¹ Харин тэнд цөлийн амьтад л

 хэвтэж,

Байшингууд нь шар шувуугаар

 дүүрч,

Тэнд тэмээн хяруул амьдарч,

Годрон буг тэнд бүжнэ.

²² Бэхэлсэн цамхгуудад нь

 зэрлэг ноход,

Баян тансаг харшид нь

 цөөвөр чоно улина.

Тэр цаг удахгүй ирнэ,

Тэр өдөр үл хойшлогдоно.