2 ¹Би бол Шароны сарнай, талын сараана цэцэг билээ.
²-Охидын дундаас миний хонгор өргөст ургамал дундах сараана цэцгийн адил байдаг билээ.
³-Залуусын дундаас миний хайрт ойн дундах алимын мод адил байдаг билээ.
Түүний сүүдэрт би үлэмж таашаалыг аван суухад
жимс нь ч надад чихэрлэг амттай байв.
⁴Намайг тэрээр цайллагын танхимдаа аваачив.
Миний дээгүүрх түүний туг нь хайр юм.
⁵Үзэмтэй боовоор намайг тэтгэн,
алимаар намайг сэргээгээч.
Учир нь би дурлалдаа шаналжээ.
⁶Түүний зүүн гар миний толгой дор байж,
баруун гар нь намайг тэврэг.
⁷-Иерусалимын охид оо,
хээрийн зээр болон марлаар би та нарт тушаая.
Тааламжтай болтол хайрыг та нар бүү өдөөн, бүү сэрээгтүн.
⁸-Сонсогтун! Хайрт минь!
Харагтун, уулан дээгүүр харайсаар,
толгод дээгүүр үсэрсээр тэр ирж явна.
⁹Миний хайрт зээр эсвэл идэр бугатай адил бөлгөө.
Харагтун, хананы маань цаана тэр зогсоод,
цонхоор харж, сараалжаар цухуйна.

¹⁰Миний хайрт надад хэлэх нь
“Босоорой, хонгор минь, үзэсгэлэн гоо бүсгүй минь, хамтдаа явъя.
¹¹Хараач, өвөл өнгөрч, бороо зогсож арилав.
¹²Газарт цэцэгс хэдийн ургаж,
Дуу хуурын цаг ирж, нутагт маань хүүрзгэнийн дуу сонсогдоно.
¹³Инжрийн мод жимсээ боловсруулж,
цэцэглэж буй усан үзмийн модод анхилуун үнэрээ тараана.
Босоорой, хонгор минь, үзэсгэлэн гоо бүсгүй минь, хамтдаа явъя!” гэнэ.

¹⁴Хадны хавцал, өгсүүр цохионы нуувчинд буй тагтаахан минь ээ,
надад төрхөө үзүүлж, дуу хоолойгоо сонсгооч.
Учир нь дуу хоолой чинь амттай, төрх чинь дур булаам сайхан аж.

¹⁵Усан үзмийн талбайг маань цэцэглэж байхад
сүйтгэн буй бяцхан үнэгнүүдийг,
тэр үнэгнүүдийг бидэнд барьж өгөөч.

¹⁶Хайрт минь минийх бөгөөд би түүнийх билээ.
Тэрээр сүргээ сараана цэцэгсийн дунд бэлчээдэг.
¹⁷Сэрүү татаж, сүүдэр арилах хүртэл,
хайрт минь, буцан ирж,
Бетерийн уулс дээрх ооно,
эсвэл идэр буга шиг байгаач.