16 ¹Тэд Бурханы авдрыг Давидын түүнд зориулан босгосон майханд оруулан тавьж, Бурханы өмнө шатаалт тахилууд болон эвийн тахилуудыг өргөв. ²Давид шатаалт тахил болон эвийн тахилуудыг өргөж дууссаны дараа ЭЗЭНий нэрээр ард олныг ерөөв. ³Бүх израилийн эрэгтэй, эмэгтэй ялгалгүй, хүн бүрд нэг ширхэг талх, зүсэм мах, үзмээр хийсэн боовыг тэр тараав.
⁴Тэрээр левичүүдийн заримыг Израилийн Бурхан ЭЗЭНийг магтан, талархан, баярлан тэмдэглэж байхаар буюу ЭЗЭНий авдрын өмнө үйлчлэгчдээр томилов. ⁵Тэргүүлэгч нь Асаф, удаах нь Зехариа, тэгээд Иеиел, Шемирамот, Иехиел, Маттитиа, Елиаб, Бенаиа, Обед-едом, Иеиел нар байв. Тэд босоо ятга, ятга, хөгжмийн зэмсгүүдтэй байв. Бас Асаф чанга дуутай цан хөгжмийг цохиж, ⁶тахилч нар болох Бенаиа, Иахазиел нар Бурханы гэрээний авдрын өмнө үргэлж бүрээ үлээж байв.
 ⁷Тэгээд ЭЗЭНд талархал өргүүлэхээр Асаф болон түүний төрөл садангуудыг тэр өдөр Давид анх удаа томилов.
⁸Өө, ЭЗЭНд талархал өргөн,
Түүний нэрийг дуудагтун.
Түүний үйлсийг ард түмний дунд мэдүүлэгтүн.
⁹Түүнд дуулж, Түүнд магтаалыг дуулагтун.
Түүний бүх гайхамшгуудыг яригтун.
¹⁰Түүний ариун нэрд алдар байг.
ЭЗЭНийг хайж буй хүний зүрх баяр баясгалантай байх болтугай.
¹¹ЭЗЭНийг болон Түүний хүчийг эрэгтүн.
Үргэлж Түүний нүүрийг хайгтун.
¹²ЭЗЭНий үйлдсэн гайхамшигт үйлсийг,
Түүний ер бусын зүйлс болон
Түүний амнаас гарах шүүлтүүдийг дурсан санагтун.
¹³Түүний боол Израилийн үр ээ,
Түүний сонгосон нэгэн болох Иаковын хөвгүүд ээ!
¹⁴Тэр бол бидний Бурхан ЭЗЭН.
Түүний шүүлтүүд бүх дэлхийд байна.
¹⁵Түүний гэрээг буюу мянган үеийнхэнд Түүний тушаасан үгийг мөнхөд санагтун.
¹⁶Абрахамтай тогтоосон Түүний гэрээ,
Исаакт өгсөн Түүний амлалтыг санагтун.
¹⁷Тэр мөн үүнийгээ Иаковд тогтоол болгон,
Израильд мөнхийн гэрээ болгон баталж өгөөд,
¹⁸“Би та нарт Канааны газрыг та нарын өвийн хэсэг болгон өгнө” гэж айлдсан билээ.
¹⁹Тэд тоогоор цөөн, маш цөөхөн бөгөөд
тэр газарт харь хүмүүс байсан үед,
²⁰тэд нэг үндэстнээс нөгөө үндэстэн уруу,
нэг хаанчлалаас өөр ард түмэн уруу тэнүүчлэн явах үед нь
²¹тэднийг дарлахыг ЭЗЭН хэнд ч зөвшөөрөлгүй,
тэдний төлөө хаадыг зэмлэн,
²²“Миний тослогдсон хүмүүст бүү хүрч,
Миний эш үзүүлэгчдэд хор хөнөөл бүү учруулагтун” хэмээн айлдсан билээ.
²³Бүх газар дэлхий, ЭЗЭНд дуулагтун.
Түүний авралын сайн мэдээг өдрөөс өдөрт тунхаглагтун.
²⁴Түүний яруу алдрын талаар үндэстнүүдийн дунд хэлж,
Түүний гайхамшигт үйлсийн талаар бүх ард түмнүүдийн дунд яригтун.
²⁵Учир нь ЭЗЭН бол агуу бөгөөд агуугаар магтагдах Нэгэн.
Мөн бүх бурхдаас дээгүүр Түүнээс эмээгтүн.
²⁶Учир нь хүмүүсийн бүх бурхад бол шүтээнүүд юм.
Харин ЭЗЭН тэнгэрүүдийг бүтээсэн билээ.
²⁷Түүний өмнө сүр жавхлан, яруу алдар бий.
Түүний газарт хүч чадал, баяр баясгалан бий.
²⁸ЭЗЭНд өргөгтүн, ард түмнүүдийн ургууд аа,
ЭЗЭНд яруу алдар, хүч чадлыг өргөгтүн.
²⁹Нэрд нь зохих яруу алдрыг ЭЗЭНд өргөгтүн.
Өргөлөө авчран Түүний өмнө ир.
Ариун хувцастайгаар ЭЗЭНд мөргөгтүн.
³⁰Бүх дэлхий, Түүний өмнө чичрэгтүн.
Үнэхээр газар дэлхий бат тогтсон бөгөөд ганхахгүй.
³¹Тэнгэрүүд баярлан, газар дэлхий баясаг.
Тэд үндэстнүүдийн дунд “ЭЗЭН хаанчилдаг” гэж өгүүлэг.
³²Далай болон түүнийг бүрдүүлэгч бүх юмс нүргэлэгтүн.
Тал болон тэнд байгаа бүх юмс баярлагтун.
³³Тэгээд ойн модод ЭЗЭНий өмнө баярлан дуулах болно.
Учир нь ЭЗЭН дэлхийг шүүхээр ирж байна.
³⁴ЭЗЭН сайн учир Түүнд талархал өргөгтүн.
Учир нь Түүний хайр энэрэл үүрдийнх.
³⁵Тэгээд “Бидний авралын Бурхан аа, биднийг авраач.
Таны ариун нэрэнд талархлыг,
Таны магтаал дотор алдрыг өргөхөөр биднийг цуглуулж,
үндэстнүүдээс чөлөөлж өгөөч” гэж хэлэгтүн.
³⁶Израилийн Бурхан ЭЗЭН өнө мөнхөөс үүрд мөнх хүртэл магтагдах болтугай. -Амен хэмээгээд, ЭЗЭНийг магтав.
³⁷Ингээд өдөр тутмын ажил мэт авдрын өмнө үргэлжлүүлэн үйлчлэхийн тулд Асаф болон түүний төрөл садангуудыг Давид тэнд, ЭЗЭНий гэрээний авдрын өмнө үлдээсэн билээ. ³⁸Обед-едомыг түүний төрөл садангийн жаран найман хүнтэй үлдээв. Иедутуны хүү Обед-едом ба Хоса нар хаалгачид болов. ³⁹Тахилч Задок болон түүний төрөл садангийн тахилч нарыг тэрээр Гибеон дахь мөргөлийн өндөрлөг дээрх ЭЗЭНий асрын өмнө үлдээсэн нь ⁴⁰Израильд тушаасан ЭЗЭНий хуульд бичигдсэн бүгдийн дагуу ЭЗЭНд шатаалт тахилуудыг шатаалт тахилын ширээн дээр өглөө оройгүй үргэлжлүүлэн өргүүлэхийн тулд байв. ⁴¹Тэдний хамт Хеман, Иедутун нар болон ЭЗЭНд талархал өргөж байхаар нэрс нь тогтоогдож, сонгогдсон, үлдсэн хүмүүс байв. Учир нь Түүний хайр энэрэл үүрдийнх юм. ⁴²Чангаар дуугарагчдад зориулсан бүрээ, цантай, мөн Бурханы дуунуудад зориулсан хөгжмийн зэмсгүүдтэй Хеман, Иедутун нар тэдэнтэй хамт байлаа. Иедутуны хөвгүүд нь хаалгачид болов. ⁴³Түүний дараа бүх ард түмэн өөр өөрийн гэр уруу явцгааж, Давид ч өөрийн гэр бүлийнхнийг ерөөхөөр буцав.