70 ¹Бурхан, намайг аврахаар яараач.
ЭЗЭН, надад туслахаар хурдлаач.
²Миний амийг эрэн хайгчид
Доромжлогдон, ичгүүрт орог.
Намайг гэмтэхэд баярлагчид
Эргэж, шившиг болог.
³“Ха, ха” гэгчид
Өөрсдийн ичгүүрээс болж эргэж буцаг.

⁴Таныг эрэн хайгчид бүгд Таны дотор баярлан, баясаг.
Таны авралыг хайрлагсад
“Бурхан өргөмжлөгдөх болтугай” гэж үргэлж хэлэг.
⁵Харин би зовж зүдэрсэн бөгөөд гачигдсан байна.
Бурхан, над уруу хурдан ирээч.
Та бол миний тусламж, миний аврагч юм.
ЭЗЭН, бүү саатаач.